Pa Hmaa te chhungkua chu Mizo Kristian chhungkaw pangngai tak niin an lang a. An fapa Zorama chu hna zawng mekin mi hausa tak Pa Rina fapa Sanga tuition pe in a inhlawh a. A nau Rinengi chu college kal lai, mahni zirlai ngaihsak aiin tunlai thil a ngaihven nasa zawk a. Class-a kal aiin café-ah hun a khawh ral fo thin a ni.
Pa Hmaa leh Nu Ziri te chu nu leh pa fel tak niin lang mahse, Zorama’n an chhungkaw nun a chhui kirin an nupa tawngkam kauchhehin an fate ah rualawhna nasa takin a lo tuh tih a lang chho a.
Pa Rina’n Sanga pass an lawmnaa an hnuaia thawk tura a sawm pawhin Zorama chuan dan kalh thil an tiru tih hre reng chungin an hnar lem lova. An chhungkaw khawsak pawhin hma a sawn chak hle a; kum 2 chhungin in nuam zawk leh awmpui 2 lai neiin an khawsa thei a.
Pa Rina chu a sum chevel atangin man a ni a; mualpho takin a tang a. Zorama’n tan ina a tlawh laia an inbiakna atangin tan ina tan tirtu chu Zorama a ni tih a hre chhuak a. Zorama chu inthiam lohna nei lem lovin Pa Rina lo thawh thin chu a chhunzawm a.
A mizia a thlak nasat tak avang leh a neihsum a chapo pui tak em avangin a ngaihzawng Sangpuii chuan Kristian chhungkua dinpui ngam lovin, an inthen a. Zorama chuan a nau Rinengi tan dawr a hawn sak a; a nu leh pate’n rinhlelhna chang an hre lova, ngaihtha takin an awmlaiin Pa Rina nupuiin Zorama lakah phuba lak dan a lo ngaihtuah reng chu bawhzuiin, Zorama chhiatna turin hma a la ve ta a.
