Zopui Lal, Lallulan Thlanrawn a rawta, Thlanrawn Lal Phunthanga leh a pasalțha te chu, bumna hmangin an that veka. Thih dan pangngaia thi lo, Thlanrawn pasalțhate thlarau chu Pialral kai thei si lo, Mithi khuaa cheng thei bawk si loin Pial lui chung velah rau chhia angin an tangkhang ta a.
Kum za danah an chakna te nei lehin, mitthi khuaa Lallula khua chu an rawn run ta țhina, Vawihnih lai rawn run tawhin, Lallula khua te chuan hnehna an chang ve ve a. Mahse, an indonaah chuan an pasalțha te an thih nasat em avangin, thlanrawn ho do leh thei tur khawpin chakna an nei tawh lo. Thlanrawn ho chu, a vawithumna atan an rawn thawk leh ngei dawn si! He indo vawithumnaah hian Lallula khuate hi an chak leh a nih chuan, thlanrawn ho chu an tlawm hlen tawh ang. Mahse, Thlanrawn ho an chak chuan Lallula khua chu a ral anga, Mitthi khua pawh chatuan atan a bo hleb tawh ang. Chu chu ngaingam loin, Mitthi khaw kawtchhuah vengtu Pu Pawla chuan, Bang lehlam, hringmite khawvelah, anmahni chhanchhuak theitu tur, Vohbik Zawng turin a kawi zinga mi Bawka a tir chhuak ta. Bawka chuan Vohbikte chu va hmuin Mitthi khaw lamah a hruaia, Thlanrawn ho rawn lan hun tur chu an lo nghak ta...
